و الموضة اللى طالعة اليومين دول انك تلاقى الحاجة حماتى تقولك ايه ؟؟
بنتى متدخلشي فى شقة سكن .. لازم تكون شقة تمليك علشان اضمن مستقبل بنتى
بنتى ميجيلهاشي شبكة اقل من بنت ……….
بنتى مينكتبلهاشي قايمة اقل من بنت ……….

بتفق معاكم شباب في كل كلامكم واحب اتناول الموضوع نقطة نقطة وسامحوني تحملوني

الأولى : ((– عدم وجود وظيفة ثابته –))

كتير اوي من شبابنا – مع يقينهم انه مافي حاجة اسمها وظائف اصلا – بيعتمدوا على تعليمهم اعتماد كلي على الوظائف بعد ما بيخلصوا تعليمهم لكن ارجع واقول انهم على دراية اكتر مني انه مافي شيء اسمه وظيفة وأصبحت الكليات بتخرج للكافتريات .

مش عيب شباب انه يكون في ايدي مهنة احترفها واتعلمها من صغري بحيث انها تكون شغلي الشاغل بعد التعليم لكن كتير جدا بيتواكلوا وبيفضلوا في بيوتهم كتير جدا ياخدوا مصروف ودا غلط كبير وراميين الحمل على انه مافي وظايف مع يقينهم انه مافي فعلا .. في انتظار وهم .

الثانية : ((– عدم وجود دخل مادي للمعيشة –))

والنقطة دي مرتبطة باللي قبلها بمعنى انه مافي وظايف منين هايجي الدخل بل بالعكس الشاب بيصبح عالة على المجتمع ومش منتج بل مستهلك وبس ودي بتربي فيه روح الإتكاليه والإعتماد على الغير في كل شئون حياته وبيكون انسان سلبي غير مؤثر في مجتمعه واذكركم بالمثل اللي بيقول : ” لا تعطيني سمكة بل علمني كيف اصطاد ” .

الثالثة (– عدم وجود شريك حياة مناسب –))

ماعتقدش واللي ينظر للنقطة دي بعين الأهمية ما يجد لها مكان في اصل السؤال يعني اهالي سمنود كلهم معروفين واكيد موجود شريك الحياة المناسب لكن العيب على اللي بيدور ما بيعرف يدور صح اكيد اللي يقول النقطة دي العيب كامن فيه هو مش في شريك الحياة

الرابعة : ((– متطلبات الأهالي المتزايدة –))

والنقطة دي بيت القصيد بمعنى انه فعلا الكل بيبص للي حوالية من الأهالي انا بنتي ما تتزوج اقل من زواجة فلانة واحنا عاوزين وعاوزين وعاوزين وعاوزين مع العلم انهم في البداية بيقولوك ” احنا بنشتري راجل يابني ” . ههههههههه لا تعليق .

لو الاهالي عرفوا كويس احصائية الإناث بالنسبة للذكور هايعرفوا ان زواج البنت اصبح اليوم من الأشياء الصعبة لأن الرجل يقابله 5 بنات بمعنى انه لو رجال سمنود كلهم اتزوجوا اربعة هايفضل من كل خمسة واحدة ما هاتتجوز ……

ماتتعبوش نفسكم 20% من بنات سمنود هايعنسوا – دا لو كل واحد اتزوج اربعة – فما بالكم باللي مش قادر يبلغ الأولى !!!

ونسيووا كلام النبي صلى الله عليه وسلم ” إذا آتاكم من ترضون دينه وخلقة فزوجوه ” .

وكتير جدا من زواجات بتضيع للسبب ده اختلاف الأهالي على المعيشة والعفش والقائمة .

الخامسة (– عدم وجود شقة للزواج –))

الشقة موجوده لكن فين الفلوس اللي هاتشتريها

ناهيكم عن نقطة اهم انه مثلا ممكن واحد يسافر برة يعمل قرشين مهما كان مؤهلة سواء بدون تعليم او متوسط او اعدادية ويرجع يشتري البنت اللي هو عاوزها مهما كان مؤهلها بفلوسة مما يؤدي الى صعوبة الحياة بينهم للإختلاف في المستوى الثقافي والعلمي والأدبي ودي من أكتر المشاكل اللي بتواجه شباب جيلنا واللي عاوزة موضوع منفرد .

معلش طولت عليكم اتمنى ان أكون قد اصبت

فيها ايه لو كل اب و ام اتساهلوا شويه مع الشباب ؟؟؟؟
و لا عاجبهم الحال ده ؟؟؟؟؟؟؟؟؟؟

الواحد يصلى ويدعى ربنا انة يحل كل المشاكل دى ..m..a..

أرجو أن يتسع صدركم لبعض الملاحظات
معظم دول الغرب او كلها ان لم اكن مخطئ يتزوج الشاب بدون مساعده الوالدين لأنه يكون قد انفصل عنهم من مده وعايش لوحده بس الزواج مشاركه عشان كده خطيبته بتساعده ازاى؟
أولا الشبكه ممكن يستغنو عنها وتكون بس دبلتين وبالنسبه للشقه عندهم نظام جميل أوى اللى هو الاستوديو وده عباره عن شقه صغيره بس فيه أوضه وصاله وحمام وبيعمل المطبخ فى الصاله أو يقسم الصاله ويعمل فيها مطبخ ويبدأ حياته لغايه مايقدر يروح مكان أحسن ودى متعه الحياه اللى هى الكفاح عشان يدوق النعمه ويحس بيها ل
على العموم أنا مش بقول لازم نعمل زيهم لأن هنا الظروف غير بس على الاقل مانحاولش ان احنا نقسو على الشباب ولو يقدر يعمل حاجه مهما كانت بسيطه لازم نشجعه ونساعده على قد مانقدر عشان الحماسه اللى عنه ماتروحش ونوجهه دايما للأحسن
ياجماعه والله الشباب عندنا كويس جدا بس مش لاقى اللى يوجهه للطريق الصح

على فكره انا لسه ماخطبتش ( ادعولى ربنا يقصر غربتى انا واللى زى ونرجع قبل مايفوتنا قطار الزواج )

أرى من وجهة نظرى الشخصية
ان كل هذة الاسباب صحيحة فعلا ولك المشكلة اننا نعترف جميعا ان هذة الاسباب هى المسبب الاساسى لما يحدث للبنات والشباب فى الوقت الحاضر
أرجو من كل الاباء وأولياء الامور رحمة أنفسهم فلديهم أيضا بنين كما يملكون البنات وبعدين اللى هاتخدة باليمين هاتصرفة بالشمال بس فى النص هاتضيع احترامك لنفسك وحب جوز بنتك ليك او مرات ابنك ليك لانك كل ماتدفع اكتر كل ما غريزة التملك عندك تزيد وصدقنى مش هاترتاح من كتر المشاكل الزوجية.
وعلى رأى المثل بتاعى اللى بيقول……..
(الخطوبة ،،طوبة لصابت لخابت،،، أما الجواز جناز(موت يعنى) إما جنة وإما نار)
ربنا يكفينا ويكفيكوا شر النار ويوهب لينا الجنة طالما بنسامح وبنخاف على عيالنا.
عساسى

ههههههههههههههههههه

يا جماعة خلينا شوية انا شايف ان كل الكلام دا مضمونة حاجة واحدة والكل بيتكلم على حاجة وهى مسألة الحالة المادية ربنا خلق لنا عقل نفكر بة الناس اللى معاها مال جابتة ازاى اكيد تعبوا كتير اوى على ما عملوها بس جابوها ازاى بالعقل بدؤا بحاجة صغيرة والحاجة دى كبرت لية عشان بيفكروا تعالوا بصوا لينا بقى تلاقى الواحد يقوم من النوم المغرب وبعدين يكوى ويلبس وياخد فلوس من والدة ويخرج مع واحدة لغاية وقت متاخر ويعشمها بالخطوبة والجواز يخلص معاها يروح لصحابة على الكافتيريا دا انا عملت كذا وكذا يخلص يروح ينام ويقوم وهكذا مقضيها يبقى هيكون نفسة ازاى دا نوع النوع التانى اللى بيشتغلوا نادر اوى فى سمنود تلاقية يقوم بدرى يروح الشغل يجى المغرب يلبس ويخرج على القهوة فى لحظة ضيع يوميتة ومقضيها هيكون نفسة ازاى النوع الثالث فى ناس ما بيروحوا على قهاوى طيب نبصلهم تلاقى بيشتغل ماشى ابوة كبر والام كبرت وما معاهم فلوس هو اكيد اللى هيساعد والاخ اللى بيقول ان المرتب يكون الف جنية دة مافيش شغلانة فى سمنود بتزيد عن 700 جنية يا حبيبى هتعمل بيهم اية هتددى لوالدك ولا اخواتك ولا جمعيات ولا لبسك ولا مصاريفك انت لو ليك اخت وجة حد يتقدملها هتطلب الاشياء دى شبكة وشقة وكل دة يعنى ماتتكلم كدا عشان تقول اختى اتجوزت احلى جوازة متبص بقى للعريس هو نظامة اية البنات ماليعم اى زنب الزنب علينا احنا لو اد الخطوبة والجواز هروح لابوها مش قدة متروحش عشان ما تتحرجش دا من الاخر والاخت اللى بتقول على قد لحافك مد رجليك دا ***** ازاى يعنى بقى الحب والمشاعر ما فية دا بيساوى دا واحدة شوفتها وعجبتنى وعايز اخطوبها اروح اقولها انتوا عندكوا فلوس اد اية عشان لما يبقى معايا قدكوا ابقى اكلمك واخطبك دا ينفع وبعدين معاك مال اد كدة بتروح للوالد والله انا معايا اد كدة وامكانياتى اد كدة ماشى ماشى والله براحتك ولو البنت بتحبك اوى والله لو فى عشة هتبقوا مع بعض لان الوالد عايز يفرح بنتة وبنتة عايزة كدة خلاص انتوا حرين المسألة ما هى مال ولا احساس بالغير وحب من طرفين لان الحب نهايتة الزواج والحب عمرة مكان بيتقاس بمال

هو عاد فى جواز والا نيلة خصوصا البنات فى سمنود بقى حاجة فظيعة يلا ربنا يستر الواحد لو فكر ف الجواز يبقى من حااالا وهو فى كلية اهوة يحجز بنت فى 6 ابتدائى عشان يضمن انها مية مية يلا سلام ولو فى عروسة ليا انا موجود اهوة

كل الأسباب تقريبا صح بس انا شايف من وجهة نظرى المتواضعه ان أكبر سبب هو متطلبات الأهالى ليه بقه؟؟ البنت تلاقيها فى تانيه اعدادى ومامتها ملبساها وعامله فيها البدع عشان تبقى عروسه وتلفت النظر والبنت طبعا تبدأ تاخد بالها من نفسها وخلاص اقتنعت انها عروسه والعين عليها وهى أساسا لسه طفله فبالتالى بيجيلها عريس واتنين وتلاته وبتبدأ ترفض لأنها حاسة بنفسها بدرى وده هيترفض عشان معندوش عربيه وده شقته اربع قوض مش خمسه فكل اللى انا عاوزه من الأهالى انهم يعرفو ان الجواز فى الاول والاخر ستره لبنتهم وليهم ويحاولو يفكرو بعقلانيه اكتر من كده وبجد نسبة العانزات فى سمنود متزايد جدا جدا جدا ..وربنا يهدى الكل ويفرح قلوب كل السمنوديه.. وسورى لو كنت طولت عليكم… عاشق الزمالك( احمد العاملى)

اولا_ من السهل انك تضحى من اجل الحبيب لكن من الصعب ان تجد حبيب يستحق التضحية؟؟؟

ثانيا_ احنا اللى مديين الفرصة للبنات يتنططوا علينا

ثالثا_ما اكتر البنات ف هزا العصر بس اهم حاجة انها تكون مضمونة ومعتش ف امان الواحد لما يفكر يتجوز يروح يجيب عيلة ف 2 ابتدائى يربيها على ايدو عشان يضمنها

ثالثا_ انا من راى ان مافيش واحدة تستاهل اللى الواحد بيعملة عشانها والتضحيات اللى بيضحيها ليها مهما كانت الواحدة دى اية وبنت مين

رابعا_ انى اضحك من كل شيء خشية ان ابكى

انا شايف ان المشكله كله في الرجاله ليه الواحد فيهم مابختارش واحده مناسبه ليه علي ادق امكانياته دايما الزبال عاوز دكتوره وبنت ناس طب ما ياخد واحدة على اقدهوالواحد فيهم ياجل الجواز سنين لحد ما يكون نفسه ماهو لو خد واحدة علي قده مش يحتاج يكون نفسه اصلا

سلام عليكم جميعا الاول
انا هدخل ف الموضوع علطول وهقول رأيى .. بصراحه انا شايف ان الموضوع زاد عن حده وان المشكله كل يوم بتكبر للاسباب الموجوده كلها
اللى اكبر سبب معطل الموضوع فيهم طلبات الاهالى المتزايده بالاضافه لان سمنود مدينه صغيره ومقفوله
يعنى مفيش فرصة عمل مناسبه يقدر الواحد يوفر منها لنفسه اللى يقدر بيه يلبى طلبات الاهالى
الا لو كان بقى مولود وفى بقه معلقه دهب زى ما بيقولوا
الله المستعان والله يعين الجميع بس
انا عارف ان المشكله مش سهل تتحل بس اتمنى ان الاهالى تخف شويه
فرجه قريب يا رجاله متقلقوش

انا مع الاخت سمنودية فى كلامها

والله معاكم حق وربنا يعنا

والله ياجماعة انا مش عارف اقول ايه لكن والله بجد الموضوع دا محزن جدا
أولا موضوع ان على اد لحافك مد رجليك اولا مبدأ مرفوض من الاساس لسبب ولو سمحتم اقروا للاخر وبعدين ردوا المبدأ دا مرفوض لان الزواج عشرة ومشاركة وتفاهم وود بين العائلتين مبدأين وبعد كدا يتطور للزوجين لكن المهم ان المطالب اللى بيطلبها اهل البنت حقهم طبعا لانهم عاوزين يضمنوا مستقبل بنتهم وفيه ناس بتطلب طلبات فى حدود المتاح لدى الشاب وفيه ناس بتطلب فوق المعقول يعني من الاخر الناس درجات ولازم يكون فيه وفاق اجتماعي وعلمي عشان يكون فيه تفاهم مشترك
بالنسبة للاخت سمنودية اللى بتتكلم فى العزومة والهدية الجواز عمره ماكان عزومة ولا هدية ولا فسحة عالكورنيش وكل دي تفاهات لكن الاهم البيت اللى هيعيش فيه لازم يكون فيه استقرار الى حد ما
بس دا ميمنعش ان بعض الاهالي بردو بتطلب طلبات مهولة والله ياجماعة متعرفوا فعلا القرش بيجي ازاى ولو الناس عرفت القرش بيجي ازاى مكنش حصل مشاكل كدا
عموما هو فعلا موضوع قسمة ونصيب لكن هو ماشي دلوقتى موضوع فلوس وشقة حتى لو الانسان وحش ومعاه فلوس هيقبلوه وبعدها يندموا
عموما ربنا يوفق الجميع ويصلح حال كل المسلمين يارب

السلام عليكم ورحمة الله وبركاته الكل بيلقى فى مواعظ فقط ولكن مشايف حد بيقول انه على استعداد ان يبدأ بنفسة اولا ومن ثم يطلب أو يشرح للاخرين تجربته . مثلا تقول ابدأ ازى . ان كان عندك اخت وتقدم لها احد لاتغالى فى الطالبات او على الاقل تطلب من الوالد ان يكون سهلا . ان تنصح الاخت بان تتحمل شوية لحين مربنا ييسر وكل شىء بيدأ صغير ونكون بسطاء فى كل شىء والله الموفق

يالى نويت تجوز اسمع الى بيحصل للجدعان بعد ماكنم شهامة ومجدع يصعبو
والله على الغلبان كان لية صاحب جة اجوز رحت ازورة لقيتة بيمسح
بالفالاية
انا مش هجوز تانى معايا واحده مجننانى

والله مفيش كلام يتقال تانى بس الا اقدر اقوله ربنا يعينكم
بس انا مش عاجبنى كلامك يا ميدو فى بنات كتير تستاهل بس اكيد المشكله هتبقى فيك انت اظن انت لو ضحيت علشان واحدة اكيد هى هتقدر
واختلاف الرأى لا يفسد للود قضيه

هههههههههههههه
طيب نصيحه كويسه يا حاج هنعمل بيها
بس الموضوع ده من الاشخاص الى عيز يعمل حاجه هيعملها ومش هيقعد يقول مفيش شغل والكلام الفاضى دا
دى حجج وخلاص وهو مبيكونش حول او دور على حاجه هو بيقول كده وخلاص

والله اللى بأمكانه يتجوز وعايز كدة يتفضل مش ولازم تتعب عشان تعرف تقوم بالخطوة دى ولا انت عايز الجواز يبقى اية الفين جنيه وتخلص الليله انت عليك مستلزمات انا شاب وزيكوا بس بكافح وسافرت عشان احقق اللى فى دماغى واتعب عشان استريح فى الاخر انت لية بتبص لنفسك انت مهو اهل العروسه بيصرفوا كمان ولا هى هتخش ببلاش كل واحد عليه مستلزمات تبع الاتفاق خليكوا انتوا كدة قاعدين وخلاص

يقول صلى الله عليه وسلم “يا معشر الشباب، من استطاع منكم الباءة فليتزوج”

و إذا جاءكم من ترضون دينه و خلقه ، فزوجوه…

فلم الانتظار؟ ماذا ستفيد الشهادات و الأموال التي “ستهطل” على الفتاة بعد تخرجهاو عملها إذا وقعت ضحية لذئب – متنكر بقناع الدين و الالتزام – زعم أنه سيعطيها ما فقدته من حب و وعدها وعود وهمية بالزواج لكي يستغلها و طهرها و عفافها؟؟؟

سبحانك اللهم و بحمدك، أشهد أنه لا إله إلا أنت أستغفرك و أتوب إليك.

ياجماعة براحة المناقشة بهدوؤ بليز….الجواز يعنى استقرار انشاء عيلة بس برجو من الشباب يتمهلوا فى الاختيار ومش يعاملوا البنات على اساس انهم كتروا ويقدورا يبيعوا ويشتروا فيهم

ياحماعة الكلام بس التنفيز صعب انت اول ما تحب وحدةمن قلبك تقول تعالى بس كلام بابا وانا مضبط معة ومع ماما واول ما يعنى تجى تتقدم اوى القطر يعم الحاج يعنى الشاب منن يعمال اية
1_ميحبش
2_علشان ميفكرش فى الجواز
3_مقيش احسن من عيشة الحرية
4_ودى الاهام
شهل ان يضحى الشاب من اجل الفتاة لكن من الصعب ان تجد الفتاة التى تستحق التضحية
5_واللة والمهم لو حصل نصيب بتعيش طول حيلتك ندمان

على فكره انا مع المثل
على قد لحافك مد رجليك
اتمنى من كل شاب قبل ما يتقدم لاى بنت يكون قادر على فتح بيت ولا يعتمد على شغلها بصراحه انا شايف ان فى عنوسه عامه فى مصر لان كل شاب باصص لفوق طيب البنات اللى ظرفهم صعبه يتجوزا مين ممكن البنت اللى ظروفهاسيئه تعمر معاك وتشيلك فى المره وتوصل معاك للقمه شويه بشويه وفى النهايه الجواز قسمه ونصيب نصيحه لكل بنت ان تحسن الاختيار مش تقول جوازه وخلاص
اتمنى التوفيق لشباب وشابات سمنود
انا بحب بلدى جدا واعشق تراب سمنود

انا ام وعندي بنات علي وش جواز والحمد لله مقتدرين اوي بس عوزه لبنتي راجل اجتماعي شهاده محترمه بيعرف ربنا ومن عيله كويسه ويقدر الكنز الي هياخدو ولا يهمني بعد كدا جاب ايه ولا سكنها فين انا اهم حاجه عندي سعادة بنتي لو هترتاح معاه ف تمليك او ايجار جديد او حتي ع البلاطه بس يضمن لي الولد انو هيحطها فعينه ولا يهينها ويفتخر بيها ويرفع راسها انا ارحب بيه علي فكره بنتي قمر ودكتوره صيدلانيه وبيجي لها اشكال الوان ادعو لنا ناخد القرار الصح ف الوقت الصح وربنا يبارك لنا ف العريس

بصوا بقى يا جماعة المشكله مش مشكله سمنود أو المحله المشكله مشكله أهل العروسين يعني ….
الخطوبة والجواز دلوقتي بقت مكلفه جدا من الجهتين يعني ممكن لو عندك أن من جهه العريس على متطلبات اليومين دول يوصل بشقة تمليك ل 125000:150000 جنية ودي لوحدها مصيبة من جهه نظر شعب مصر كله يروح يعني يشتغل تاجر مخدرات ولا يستنى أنه يشق جيب واحد
طيب ومن جهه أهل البنت طبعا سيبك من البنت مش مشكله ينخرب بيت أبوها ولكن المهم أنها تكون دخله في شقة اعلى موديل في السوق والمطبخ 3 سوبر لوكس وطبعا أنتوا عارفين مين اللي وراها الحاجة امها

أنا بس حبيت أوضع ايديكم على لب بركان هينفجر قريب جدا

أحنا ليه بنقلد دوله زي الإمارات يعني دوله 98% منهم مليارديارت والفلوس دي جايه من الهوا طبعا كل مصر عارفه الفلوس دي جايه منين من البترول يعني الواحد منهم لو عاوز يجيب شبكه هيجيب 2 كيلو وهنا في مصر عاوزه الأم ان واحد من الإمارات يشيل ويدفع أظن ان الأهل لو بيربوا أولادهم للبيع وللشراء فعندكم شارع الهرم

من الأخر أنا عاوز أقول أحنا ما نتبعش سنه رسول الله ليه اللي دلوقتي الغرب بيقلدوها
يعني لما يبدقوا حياتهم على قدهم أحسن من اللي بيحصل دلوقتي
تلاقي الواحد جهز وخلص وعليه ديون الدنيا والأخره وفي الاخر بنتك هيكون معاها عيل أو إتنين وأبوهم يقما هربان يقمى في السجن..!!!

أبوس إيد أهالي مصر راجعوا نفسكم تاني وشوفوا العادات الزباله اللي بناخدها من المسيحين زي الشبكه والعزومات والمواسم للطرفين و شقة 3 سوبر لوكس راجعوا نفسكم قبل ما البركان ينفجر

يجماعه مشكلت الجواز محتاجه حل بسيط جدا عزيمه وارده واختيار الوقت المناسب وده بيجى لم اقول عايز اتجوز يبقى اسعى مش اقل من غيرى واصبر مستعجلش وفى ويريت مننساش التقرب الى الله ومراعات الضمير الى بقى شبه معدوم

يا جماعة ارجعو لدينا الحنيف تجدون السهولة واليسر وابتعدو عن التعصب الاعمى والنظر للاخرين واتقوا الله فى دينكم ودنياكم تجدون السعادة

اولا اني اشفق علي كل شاب وبنت في سمنود من قلة فرص العمل وبالتالي تاخر سن الزواج لان الشباب غير قادرين علي تحمل تكاليف الزواج عندي فكرة واتمني ان يتم تحقيقها ونبدا باهلنا في مركز سمنود وهي 1-بالتعاون مع الجمعيات الاهلية ورجال الاعمال من المركز لاقامة حفل زفاف جماعي ويقام في الاستاد وذلك لتوفير تكاليف الافراح من اكل وكروت وخلافة 2-عمل ندوات لتوعية الامهات بس لان عندهم الحل السحري للموضوع كلة في تسهيل الامور وعدم الغالاة في الطلبات من العريس 3- نداء الي الرجال ان لايشتروا الا ما يحتاجة المنزل فقط من الاشياء الضرورية والتي يستعملها اانسان في حياتة اليومية مش الي توضع في الكراتين وتشمعولا تستعمل ابدا ابدا وان شاء اللة سوف نبا حملة لذلك من العام لعمل حفل الزفاف الجماعي في العام القادم انشاء اللةوهنبدا الحملة من ميت عساس حيث مقر جمعية بشائر الخير الذي سوف تنظم الحفل بالتعاون مع المحافظة

im my plain opinion ,marriage is one of the life accessories ,and obviously some thing like marriage needs to be qualified for it
i won’t say qualified for the marriage absolutly but qualified for the level u r looking for.
so in that difficult economical situation ,
firstly u have to estimate ur financial situation then upon it try to look for the suitable girl
good luck for all guys who seek marriage
pray for me to find the suitable girl
DR.ghanem ENGLAND

المشكلة في الزواج بجد ان مفيش حد فينا عنده استعداد بجد انه يتحمل مسئولية بيت

بصوا باْه بلاش نضحك علي بعض الشباب خايف علشان الوحش حواليه كتير وكتير قوي مش غلو الاهالي اي نعم فية محترم كتير بس ضايع في الزحمة

والله العظيم يا شباب كلكو كلامكو زى العسل والله وصح جدااااااا
انا عن نفسى مريت باسوء سبب اترفض عشانه وهو انى معنديش شقة تمليك
انا شاب عندى 24 سنة ممكن تقولولى واحد فى سنى يجيب منين 80 الف جنيه ع الاقل خااااااااالص دا غير الجهاز؟
انا بقول لكل اب لبنت اتق الله فى بنتك والشاب اللى جاى لبنتك واحب اقوله انك هتشيل ذنب الشاب دا لو غلط وللا مشى ف الحرام وهتشيل ذنب بنتك كمان لو مشيت مع شاب وعملت معاه علاقة من وراك ويكفى انى هقوللك ان الرسول صلى الله عليه وسلم قال (اذا جائكم من ترضون دينه فزوجوه) وانا شايف ان الشباب والله مظلوم وانا بتكلم لانى واحد من المظلومين دول

انا من طنطا و كنت بحب واحدة من سمنود والمفروض اننا كنا هنتجوز رغم ان هم اللى جم البيت عشاني عشان يختاروا ولاد الناس ولكن المشكلة والخلاف على مكان الشقة رغم ان امكانياتي تسمح باني اشتري شقة فى حدود المعقول وكان الخلاف انى اعيش فى اسكندرية ولكن الناس دايما تقف فى طريق الشاب بتعجيزات ومبررات ليس لها اى معنى او اى داعي والحمد لله اشتريت شقة ليا تمليك فى طنطا بس الواحد بردو مش بيزعل لان ربنا بيقدر له الخير اينما كان ومحدش عارف الخير فين
وعسى ان تكرهوا شيئا وهو خير لكم وعسى ان تحبوا شيئا وهو شر لكم

يجب على اى اب وام انهم لا يقفوا فى طريق ابنتهم او طريق الشاب المقبل على الزواج من ابنتهم لان الظروف المعيشية فى مصر صعبة والحال من اسوأ الى اسوأ فى العصر الحالي والزواج ليس له اى شروط طالما تحقق القبول والرضا والراحة والاقناع عند الشاب والبنت لان هم اللى مقبلين على الحياة الزوجية وده ارتباطهم واستقرارهم

الى الاخت السمنودية حتى النخاع – تعليق رقم 31

احب ان اقول ان مصاريف الشاب اكتر من جهاز البنت بكتير ولا يمكن الاقناع ابدا بعكس ذلك بدليل ان الشاب مطلوب منه حاجات كتيرة مسؤول عنها واكبر حاجة صعبة هي تمن الثقة فكيف تقنعيني بخروجات وفسح وكلام فارغ بان ده كله اكتر من تمن الشقة وتوضيب الشقة اذا كانت تمليك اذا كان انا اساسا شقتي مكلفاني ربع مليون جنيه ولسه بصرف عليها عشان اوضبها وكل واحد بيجهز على اده ولكن دلوقتي اقل شقة فى مصر تمنها كام وهل هي من مسؤولية الشاب ولا البنت ومتكلمناش على الايجار وفى بعض الاهالى مش بيوافقواعلى شقق الايجار ويقولك لازم شقة تمليك يعني كلها حاجات مبررات تعجيزية ملهاش اى لزمة

لما الشاب بيجهز ويجيب شبكة ويدفع مهر عشان يشتروا غرف للسكن لا تنسي ايضا ان حمل مصاريف المعيشة على الشاب بعد الزواج وده حمل ومسؤولية كبيرة ومش سهلة ذى منتي متخيلة انما لو جينا حسبنا جهاز البنت بالكتير ميتعداش 30000 جنيه وكل واحد بيجهز بنته على اده وكل شاب بردو بيدفع اللى يقدر عليه وده طبعا مراعاة لظروف البنت انه مش يبهدلها طبعا اهم شئ ان تكون المعيشة ميسرة ويقدر يكفي احتياجات البيت وبعدين الاتفاق ممكن انه يتم المصاريف بالنص فيما بينهم ده اذا كانت الشقة ايجار ويجهزوا هم الاتنين بالنص فى المصاريف

والله لو على كلامك وكل واحد يدفع شبكة ب10000 و3 غرف كان زمان كل الناس اتجوزت ولكن معظم الناس مش بتوافق على كده
المطبخ ومستلزماته والسجاد وادوات كهربائيه ونجف والفرش بتاع القوض عليها مسالتش نفسك دول هيتكلفوا كام…………………………..
معلش كل الكلام ده كلام فارغ مقارنة بمصاريف الشاب لان الشاب بيدفع اكتر من كده فى شراء الشقة وتوضيبها او حتى لما يدفع لها ايجار ويجهز وبعدين ممكن التجهيز هيتم بالنص ومش هيكون التجهيز متحمل عليه لوحده او على اهل البنت لوحدهم

لما بتروح البيت معاك الهديه دى انت بتقعد تتعزم تكلفة العزومه دى بتقف بكام طبعا الهديه بتاع حضرتك موش هتيجى نص ثمن العزومه اللى معموله لحضرتك والعيله الكريمه
وبعدين الموضوع مش بيقاس بهداية وعزومة ولكن بيكون كمجمل للمصاريف كلها وفى حاجات لابد منها والعزومة مش بس للعريس ولكن بردو العريس بيرد العزايم دي مينفعش تقراني هدية بعزومة ولا ينفع تقارني عزومة بتمن شقة او تجهيزها انتى بتقارني بين حاجة صغيرة خالص بحاجة كبيرة وتمنها ضخم وده فى الاساس غلط
اذا كنتي هتعملى مقارنة يبقى لازم تشوفى مجمل المصاريف بالنسبة للتجهيزات عند الولد والبنت من شبكة ومهر وتمن شقة وتوضيبها وفرش الشقة وتكاليف فرح وتصوير وكوافير مش بالعزومة والهدية

يعنى حضرتك بتروح لواحده انا هجيب وهجيب وانتم عليكم كذا وكذا
طيب حضرتك اسال على اللى هما هيكلفوه هيتكلفوا كام بالمقارنه بتكلفة حضرتك يبقى هما الخسرنين – كل الكلام ده مش مقياس لان التحميل على ابو العروسة مش لوحده وانتى بتتكلمي من دافع انك بنت بس وكل بنت لها ظروفها او شاب له ظروفه الخاصة وانا لا اؤيد ارائك بصراحة وبعدين انا هقول لك ان تمن شقتي بيوصل ل 300000 جنيه مش معقولة ابو العروسة هيغرم نص المبلغ اساسا لا يمكن اصدقها ولا حتى هيغرم لحد 100000 جنيه فبلاش كلام فارغ ملوش لزمة

ده كفاية تمن الشقة اساسا كفيل باى مصاريف هتتكلموا فيها وانتو عارفين العقارات فى مصر اسعارها ايه
والبنت مش تشحطت نفسها وعليها تحسن اختيارها بالشئ اللى يريحها ويوفر لها الامان واهم شئ فى الزواج الاقناع والقبول والرضا والامان

يعني هو ابو العروسة هيجيب شقة مثلا بالشئ الفلاني وهيفرشها لوحده؟ لا طبعا
انا بقول ان الشاب عليه الحمل الكبير المسؤولية الكبيرة وابو العروسة لما بيساعده فده شئ مش وحش وواجب لانه اسمه عدل البنات طالما ان الشاب ده مستواه الفكري والتعليمي يتوافق مع نسب اهل العروسة وده اهم شئ ان الناس تشتري ولاد الناس والتفكير ميكونش مادي بالطريقة دي وخصوصا اوضاع مصر فى اسوأ حالها ومش بس دي مشكلة الشاب او البنت ياجماعة اللى بينتج عنها عنوسة او نتيجة ان مفيش شغل او بطالة ولكن دي مشكلة جيل بحاله ان الجيل اصبح فاسد بسبب الاعلام والتعليم الفاسد الفاشل ومفيش حاجة ناجحة ومش فاشلة فى مصر

ارجو اكون وضحت الفكرة اللى كانت بتتكلم عنها الاخت السمنودية حتى النخاع

الانسة كوثر علي فكره كلامك مستفز وضيقني ايه بنت وابن وبعدين مبروك عطيه ده المفروض يبقي اسمه مجنون عطيه والله السادات اعظم رئيس اتجوز بنت الباشا وكان عامل بالاجرة متعشيش في الدور واعرفي ان الزبال ممكن يسعدك اكتر من الدكتور يا دكتورة

صلو على النى يا شباب اهل سمنود مترموش الحمل كله على اهالى البنات بصو لنفسكو الاول كل واحد فيكو قال كلمه يبص لنفسه الاول هل انت فعلا راجل تستحق انك تتجوز انتو فاهمين الجواز ده كلمه سهله او موضوع سهل الموضوع اكبر ما انتم متخيلين الجواز يعنى مسؤليه ومسؤليه كبيره بصو حوليكو تلاقو جوازات كتير جدا بتفشل بسبب ان اى اب عايز يفرح باابنه ويجوزه بدون حتى ما يعرف ابنه ده قد المسؤليه دى ولا لا جوازات كتير فشلت بسبب ان الراجل فيكو اللى مفكر نفسه راجل اول ما يقع فى اول امتحان للمسؤليه بيفشل ومبيقدرش يشيل المسؤليه دى دا ميمنعش ان فى شباب كتير قد المسؤليه دى احسبوها بعقلكو الاول ومحدش يرمى العيب على اهل البنت الا لما يشوف نغسه الاول هو راااااااااااااااااااااجل ولا لا وعندى كلام كتير ممكن اقوله بس مش هطول عليكم اخوكم فى الله احمد ابوسالم (ابو الامير)

ايه مشكلنكم يا سمنوديه وليد من الرياض بالسعوديه